【好去處】山頂廣場一連串寵物活動狗狗大玩特玩

唔知各位主人有冇最近有冇帶狗狗出去玩下呢？依家天氣開始冇咁熱，相信一班寵物都已經做好準備，出去大玩特玩，未諗到帶寵物去邊到玩既主人，不妨帶佢地去玩山頂廣場10月既一連串活動！

不同的寵物活動

10月既每個星期六都會有4個唔同主題既寵物工作坊同體驗活動，其中包括「寵物芳療及按摩工作坊」、「寵物天然護理用品及製作工作坊」、「速寫寵物似顏繪」以及「寵物塔羅體驗」，相信可以令主人了解更多關於大家既寵物，亦可以同寵物有更多互動。同時，唔理你係參加左以上4個活動中既邊一個活動，都可以獲得下列兩個活動既優先報名資格。

寵物行為及訓練講座

而係10月29日既下午3點至4點，山頂廣場邀請左犬隻訓練師Yan Sir，犬隻訓練師及身心諮詢顧問Kwan Li黎講解寵物既行為有咩意思，以及教授我地應該點樣去訓練寵物，例如：犬隻既基本學習模式及正向訓練的運用；係犬隻眼中的世界以及訓練理念、基本指令、不搶繩散步方等等既技巧。係山頂廣場既環境下聽住兩位專業人士既講解，享受住陽光同微風，真係又放鬆又可以學到野。

狗狗競技賽

而完左Yan Sir同 Kwan Li既講座，係10月29日下午4點至6點，仲會有狗狗競技賽！到時係賽道上會有唔同既障礙物，例如雪糕筒、車輪、獨木橋、矮欄，最快既主人同狗狗將會成為第一名。嬴唔到都唔緊要，其他完成賽事的狗狗都會得到一面獎牌。另外，活動當中仲設有「最萌寵物獎」，到時候主辦單位會以參賽狗狗的服飾及比賽表現選出可愛與智慧並重的最萌寵物。比賽以及頒獎過後，大家仲可以同心愛既狗加一齊欣賞日落。