仲有一個月多少少就到聖誕節，唔同商場都開始好好咁設計場景，等大家放假得閒既時候可以去打卡，又可以放鬆一下，感受聖誕既氛圍。港鐵4大商場亦唔例外，設置左唔同既打卡位，不如一齊黎睇下有咩好睇！
4大玩具聖誕場景
首先講下Popcorn既「夢‧玩‧車站」，係「夢‧玩‧車站」之中會有8大本地原創角色（慢星球人阿Pi、BURGER KUN、SamSam、Angel Cat、妹頭、The Flower Fox、Mini Barber Chunk及功夫三腳貓）同大家一齊去歐陸小火車到四周圍去！同時，唔理係售票處、月台定小火車車卡，都係以聖誕紅色作主調，令大家可以更加投入係聖誕節既氛圍！同時，8大本地原創角色仲會藏身係車站內5米高巨型玩具燈塔既禮物當中，等大家去發現佢地！
下一個就係德福廣場既「聖誕機械工場」，到時係德福廣場除左會見到五獅合體既百獸王，仲會見到1.8米高的《機動警察》英格倫1號機，1.5米高香港重機以及《超時空要塞》既韋基利VF-1S係到做緊唔同既任務。如果大家想了解更多關於機體既構造，到時亦可以到達場內既觸控屏幕及展櫃，去欣賞珍貴既玩具設計圖、部件組裝過程及珍藏模型！
而青衣城亦會舉辦一個「聖誕遊樂園」，當中有以粉紅色作主調加上嘉年華造型既勞蘇，同大家玩一齊玩機動遊戲；Q版既小飛象及小老鼠好友Timothy為大家獻上馬戲團表演；貪睡既加菲貓；6.5米高既夢幻燈塔；充滿玩具展品既甜品隧道；可以玩捉迷藏同搖搖板既甜點遊樂場；仲有打卡好地方雪糕魔法鏡，唔同景點等住大家去行下！
最後係The LOHAS康城就會有「正義英雄基地」，當中亦分劃成Marvel區以及HKBTA區。Marvel區會有1.9米的Iron Man Mark 3，大家到時可以近距離欣賞唔同上色風格既炫目裝甲！而係HKBTA區就會搵到1.6米高穿上裝甲既《機動奧特曼》擺出招牌十字死光姿勢等住大家去打卡。另外仲有會手持雙頭長槍既近2米高《宇宙騎士利刃》主角登場，帶你重溫返每幕既經典戰鬥場景！
珍貴模型展品
4個港鐵商場除左聖誕主題場景吸引之外，當中出展既模型展品亦十分吸引。30既本地生產商展出合共約180件「鎮店之寶」，等咁多位玩具迷可以盡情咁慢慢睇！其中包括首次亮相既真三一萬能俠1號機（黑色版）、MDLX版變型金剛系列、全球只有一件既Kennyswork SamSam Special Edition小丑（手繪特別版）！而唔同玩具既模型製作流程或手稿亦會係場內展示出黎，等大家都可以對背後既設計理念有所認識。
消費回贈
同時間，4個商場仲會推出「齊賞聖誕」獎賞回贈。2022年11月11日至2023年1月2日，MTR Mobile既登記用戶係港鐵商場同日以電子貨幣滿HK$2,000，就可以獲得HK$200優惠券；同日累積消費滿HK$6,000，更額外獲得HK$800優惠券，每人每日最多可以拎到合共HK$1,000既電子優惠券！