為左慶祝大家可以搭飛機去旅行，機場快綫亦同旅遊大使「機鐵仔」合作係今個聖誕以及新年假期呈獻唔少既精彩活動，當中除左有唔少既超筍優惠，「機鐵仔」更加會係某個時候快閃，大家都可以捕捉下佢！
超筍優惠
打響頭砲既有搶HK$1機場快綫車票，港鐵公司係黎緊12月7日將會推出「搶HK$1機場快綫車票」既網上活動，大家只需要登記成為MTR Mobile用戶，就可以係活動當日下午2時起，透過MTR
Mobile內「我的獎賞」，以先到先得形式搶HK$1機場快綫車票，名額只有10,000份！而獨有優惠碼會係搶到HK$1車票後既24小時內加入到「我的獎賞」內既「禮品」頁面。
由12月8日至2023年1月31日，經MTR Mobile或港鐵網站，輸入搶到既優惠碼，就可以用HK$1買到機場快綫成人或小童單程票一張（原價高達HK$110），仲可以係購買日起92天內使用，真係唔搶唔得！
除此之外，第二擊：小童免費長者半價優惠。由12月16日至2023年1月29日，三至十一歲既小童使用有效既小童八達通可以免費乘搭機場快綫；六十五歲或以上既長者使用有效既長者八達通或樂
悠咭，亦可享有半價乘搭機場快綫，由香港站、九龍站或青衣站往返機場站都得！
超筍優惠更加有第三彈：的士轉乘優惠。由12月16日至2023年6月30日，乘客經MTR Mobile跳轉至預約的士平台etaxi，即可以用7折預約的士前往香港站、九龍站或青衣站轉乘機場快綫；回程係etaxi以原價購買機場快綫車票，再轉乘的士前往目的地，亦可以享有 30%車票等值之的士車費回贈。
驚喜彩蛋
其中一個驚喜就係「機鐵仔」主題列車。係12月16日起，機場快綫之內將會有一間以「機鐵仔」為概念既列車行駛，每節車卡將會滿佈得意可愛既「機鐵仔」圖案，並可以係車站內收聽王菀之聲演既「機鐵仔」唱既《飛得去旅行》，改編自黎明《眼睛想旅行》，帶俾你不一樣既機場快綫旅程！
另一個驚喜就係「機鐵仔」登場派限量精品！12月20至24日，「機鐵仔」將會係機場快綫香港站、九龍站及青衣站快閃現身，派發限量版「機鐵仔」精品套裝，套裝中亦以可愛設計既防疫裝備，大家記得快去！