七月子華神「金盆o浪口」揀篤笑今日正式開賣！相信各位Fans到而家呢一刻都心急如焚，媽聲四起，天怒人怨，就連小妹我試足全日咁多個鐘都無次得，就算我九星連珠登入到，又如何～～～比希特拉翻生都一樣買唔到！

試足七個鐘都登入唔到

香港人真係苦命，連買自己既心頭好都要咁多波折，其實買唔到演唱會票／球賽票都已經唔係新鮮事，但今次主辦單位就真係大失預算，好多網民都留言話AEG Server已經死晒，電話又唔通，各大論壇都嘈到拆天，甚至去子華神個FB Page發泄！小妹我試足全日都入唔到，嗚嗚，唔通想親眼睇子華神都咁困難？

登入到，又～如～何～

大半個鐘頭前，小妹終於九星連珠登入到啦！！！本來滿心歡喜揀場次，仲想買多幾張比同事，點知，無論我揀邊一場，幾多張飛，咩價位，系統只係彈左一句：可提供的門票數量不足，請重新選擇。T__T

港人常用既Cityline都已經比人鬧得好勁，但都叫做有機會買到，而且登入到都可以買到心儀場次。今次搞既AEG？到而家個server都係Down左，登入到都無用，場場都話數量不足，又唔同人講邊場有得買，又無得揀位，可以話系統極度唔User Friendly！

梁家傑都呻買唔到飛

前立法會議員梁家傑都喺FB度大吐苦水，佢喺九點前已經乖乖地登入，但都係登入唔到，甚至見到黃牛黨已經喺九點前喺「黃牛網站」，見到$880飛炒到$1348，未開賣先炒起，究竟係咩玩法？

各界成日都強調引入更多科技，甚至將香港打造成智慧城市，但喺買賣交易系統上，似乎仍然係停滯不前。

小妹我其實都好忙，試左成日都唯有忍痛放棄。在此祝福各位讀者：祝君好運，成功買票。