半年前去北角「Full Gear」嘅原因你懂的，但而家去北角，或者需要真嘅「Full Gear」。
北角呢個地方由半年前已經成為全香港焦點，而家武漢肺炎爆發，北角瞬間淪陷，超過 20 個患者含有「北角元素」：北角明星海鮮酒家 29 人飯局 6 個中招、北角福慧精舍 11 個中招、48 歲患病北角警員更出席 60 人嘅警員同袍退休宴會，就連 KFC 北角分店都有員工中招……
或者小編可以好有信心跟住成龍咁講「問我國家那像染病」，再跟風水大師李居明咁撩幾下口罩面頭施法術加持神力去抗疫，但最近由 WhatsApp 收到一條轉寄過嚟，聲稱係消防救護密料：「整條北角道, 春秧街, 南方大廈, 南天大廈, 璇宮大廈, 皇冠大廈 都有懷疑確診個案」，叫人暫時唔好去北角，消息寧可信其有，不可信其無。北角東接鰂魚涌太古、西接銅鑼灣，有船去紅磡九龍城、經東隧就到觀塘九龍灣，交通便利。弊在北角唔可以「封城」，而家肺炎攻陷北角，其他地方亦心驚膽跳「驚住染病」。
當好多肺炎患者曾在北角出沒，唔通以後出入甚至經過北角都要 Full Gear？
